صدقني ممكن الكلام التحت ده يكون سبب في تغيير حياتك ووضعك ومستقبلك للأحسن وللافضل ، قبل فتره كتبتا عن اني بصرف اكتر من ٣٠٠٠ دولار في السنة لانجاز مهام واعمال في منصات العمل الحر واتعاملتا مع اكتر من ٨٠٠ مستقل وبالغلط مالاقاني مقدم خدمات مستقل سوداني ، فشنو عايزين ننشر الثقافة والصناعة دي عند شبابنا عشان تتوفر ليهم الفرص 
خلونا نتفق اول انو قد ماتكون ما مهتم بس عارف زول ممكن يستفيد فشنو تقوم تتاقيهو
وممكن تكون مهتم بس اسي ماعندك وقت تقرا التدوينة دي فاحتفظ بيها وشيرها في مكان ترجع ليها لما تفضا
متفقين ،، طيب يلا نبدأ
خلونا نتفق اول انو قد ماتكون ما مهتم بس عارف زول ممكن يستفيد فشنو تقوم تتاقيهو
وممكن تكون مهتم بس اسي ماعندك وقت تقرا التدوينة دي فاحتفظ بيها وشيرها في مكان ترجع ليها لما تفضا
متفقين ،، طيب يلا نبدأ
______________________________________________
بنسمع دائما بالعمل الحر والمُستقلين freelancers بس يمكن كتير جدا من الناس ماعارفين كيف الواحد ممكن يدخل للعالم ده ويوفر لي نفسو مصدر دخل ممتاز ، في سلسلة مقالات حاستعرض معاكم كل مايخص مجال العمل الحر من الاستعداد للبدايات للتسويق للاحتراف .
اول حاجة خلونا نتعرف على العمل الحرّ و المُستقلين
( العمل الحرّ هو مُصطلح يُطلق على الأعمال التي تُدار من طرف أشخاص يعملون لحساباتهم الشخصيّة والذين أطلقنا عليهم مفهوم المُستقلين "freelancers" )
يعنى ممكن نصنف الدكاترة اصحاب العيادات والمحامين والنجارين والصنايعيه وكل زول شغل حر نفسه ولحسابه الخاص تحت مظلة ( المستقل ) والعمل الحر
لكن نحنا فى سلسلة المقالات دي مستهدفين العمل الحر المعتمد على المهارات الشخصية ( كمهارات التصميم الجرافيكي والبرمجة والكتابة والترجمة وادخال البيانات والتصوير والمونتاج والاستشارات ومهارات التسويق والمبيعات والمحاسبة والتحليل والسوشال ميديا والعشرات من المهارات ... الخ).
ممكن نقسم العمل الحرّ إلى:
عمل مُستقل كامل: يعنى يومك وزمنك كلو متاح للعمل الحر
عمل مُستقل بشكل جزئي: يعنى تكون شغال وظيفة صباحية مثلا وتشتغل بالليل ( كمستقل )
سلسلة المقالات دي حاتركز على المبادئ وننتقل خطوة بخطوة ابتداءً من الانطلاق وتأسيس العمل ، وتصميم العروض والترويج والتسويق وإدارة العمليات والوقت، وكمان حانتكلم عن ابرز المشاكل الممكن تعترض طريقك فى مسيرتك لبناء مسيرة احترافية في العمل الحر .
قبل ماندخل في القصة عايز اقول كلمتين ، الحياة مستمرة ومابتتوقف ابدا وفكرة الامان دى في اعتقادي الشخصي غير موجودة في الواقع عشان كده محتاجين الواحد يسعى بشكل دائم علشان يوفر لنفسه مصادر دخل متنوعة تساعدوا يمشي في الحياة ويحقق احلاموا وطموحاتو باشكلها المختلفة البتكون غالبا فى شكل اهداف منها اكاديمي ومنها اجتماعي وبعضها ليهو علاقة بالرفاهية واسلوب الحياة بشكل عام
العمل الحر لو الواحد فعلا قدر انو يديهو وقت والتزام ومثابرة ممكن تحقق من خلالوا دخل مادي ممتاز واكتر من ممتاز كمان ، بس الجدية والالتزام والمثابرة والانجاز
ابرز الحاجات الممكن تخليك تشوف العمل الحر ملاذ آمن ليك وفرصة كويسه انك تتوجه للمجال ده
1- حاتشتغل مع نفسك : يعنى انتا مدير نفسك ومتخذ قرار فى حاجاتك ، كتير من الاشخاص رغم انهم مُنضبطين ومُنظمين بس فكرة العمل الوظيفي ومسكه الزمن من الساعه 8 للساعة 3 وكل حاجه عايز تعملها تمشى تطلب اجازة وتنتظر توقيع وموافقة ولحدى ماتطلع الموافقة حاجتك العايز تعملها وقتها زاتو بيكون فات ، يلا القصة دى مابتنفع معاهم ، عشان كدة العمل الحر المستقل بالنسبة ليهم ملاذ آمن جدا زمنك فى يدك ودخل عالى بس برضو عايز ناس مُنضبطين ومُنظمين
2- مصاريف تشغيل قليلة جدا : بالمقارنة بالبزنس الكبير والتجارة والقصص دي رأس مالك كلو ( انترنت زابط – مكتب ومكان هادىء – ولابتوب )
3- مرونة عالية : يتميز العمل الحر بالمرونة يعنى انتا البتحدد كل حاجه فيهو وبعدين بتقبل المشاريع على حسب وقتك الفاضي فيهو وممكن تتابع كل حاجه من كل مكان وفى اى وقت والتواصل كذلك مع العملاء والزبائن في اى وقت تريد .
4- سوق عالمي : النوع ده من العالم مافيهو جنسيتك شنو وقاعد وين ، سوق عالمي كبير وطلب عالي جدا على مدار الساعة وفي ازدياد مُطّرد.
5- شغال في شغفك : معظم المستقلين بيكونوا شغالين عبر استغلال مواهبهم ومهاراتهم المُحبّبة .
6- دخل عالي : بتزيد دخلك كل مازدت انتاجك وساعات عملك وبترفع درجة الأمان المعيشي ليك ولى أسرتك
"العمل الحرّ ماعندو علاقة بعدم الانتظام ، نجاحك كمُستقل في المستقبل البعيد يرتبط بكونك مُنظّمًا، مُلتزمًا، مُنضبطًا وشاطر في مجالك "
طيب منو الناس الممكن من بكرة يخشوا الرصة طوالى ويشتغلوا كمستقلين ؟
الرد على السؤال ده ببساطة ممكن يكون انو اى مهارة اوموهبة عندك ممكن تقدمها لى زول من غير ماتقابلوا ممكن تكون هى الحاجة البتقدمها كمستقل وتكسب من وراها قروش
اديكم كمثال / فى واحده من المنصات العربية كان فى واحد مصري مقدم خدمة انو اى زول ما شاف مصر انا ممكن اكتب اسموا في ورقة وامشى اتصور ليهو سلفي مع بالورقة مع الحته العايزها زى الاهرمات او ابو الهول J الخدمة ممكن تشوفها هبله لكن لما تلقا انو كسب من وراها 500 دولار حاتعرف انها ابدا ماهبله
فى زولة سودانية برضو فى نفس المنصة بتقوم بترجمة الافلام ، يعنى عندك فيلم او مقطع فيديو عايز تترجموا بتقوم هى بالترجمة وتنزلها ليك فى الفيديو وكل 5 دقائق ب5 دولار
في ناس بكتبوا سيناريوهات وفى ناس بعملوا تصاميم وناس بعلموا ليك بحث حول حاجه معينة وينسقوهو ليك
في ناس بتعمل ليك ويب سايت وناس بترسم ليك صورتك بقلم الرصاص ، عشرات ومئات والالاف الخدمات موجودة ومتوفرة وبنفس القدر هناك مئات والالاف الطلبات لناس عايزه ناس تشتغل ليها
طيب اخر حاجه في المقال الافتتاحي ده عن العمل الحر هو كيف المنصات بتاعت العمل الحر دي بتشتغل
المنصة عبارة عن موقع الكتروني زى الفيسبوك ده كده بتعمل فيهو حساب وبروفايل وبتسجل باسمك وصورتك ومعلومات عن مجالك وتخصصك ، بعض المنصات بتيح ليك تعمل اعلان عن خدمتك البتقدمها وبيخشوا عليك الناس العايزنها ويطلبوها ، وفي بعض المنصات بتلقا الطلبات موجودة بتخش تقدم ليها وفى منصات الاثنين معا J عرض وطلب
طيب ده كان مقالنا الأول وافتتاحيتنا لسلسلة تدوينات عن العمل الحر
بعد بكرة نتلاقا ونتكلم عن المنصات واحده واحده ومميزاتها وطريقة عملها
ممكن تخشوا على حسوب اكاديمي حاتلاقو عدد ضخم من المقالات والتدوينات والنصائح حول العمل الحر https://academy.hsoub.com/
الناس الحابه تتابع سلسلة المقالات عن العمل الحر ممكن تتابعوها هنا على الفيس بوك علي حساب امجد البصيري
او ممكن تكتبو الهاشتاقات دي علي فيسبوك وان شاء الله حتظهر ليكم كل الشروحات
إرسال تعليق